Castroverde prepárase para a Cabalgata dos Reis Magos 2025
O próximo 5 de xaneiro, o Concello de Castroverde celebrará a súa tradicional Cabalgata dos Reis Magos, un evento máxico que encherá de ilusión a pequenos e maiores.
A xornada comezará ás 17.00 horas, cun percorrido que partirá do mercado gandeiro e pasará pola praza do concello, rematando no centro sociocultural Paco Pestana.
No centro sociocultural, os Reis Magos realizarán a entrega de agasallos a todos os nenos e nenas. Como requisito, cada pequeno deberá levar a súa carta previamente enviada ao concello e entregala ás Súas Maxestades para poder recoller o agasallo.
Ademais, na mañá dese mesmo día, os Reis Magos visitarán a residencia de maiores O Castro, compartindo momentos de alegría cos usuarios e traballadores do centro.
O evento, organizado polo Concello de Castroverde, conta coa colaboración de asociacións locais como ANPA, Forno da Vella, Zuncurrundullo, A Chave das Noces e o equipo feminino da Sociedade Deportiva de Castroverde, co apoio da Deputación de Lugo.