Deportes

Desde o club sosteñen que estes “resultados meten de cheo ao PortaMiñá na pelexa cos mellores clubs de natación Absoluta nacional”

Catro nadadores do Club de Natación PortaMiñá de Lugo conseguiron meterse en finais de diferentes probas coa súa participación no Campionato de España Absoluto de natación de inverno na piscina M86 de Madrid.

Este campionato era clasificatorio para o próximo campionato do mundo e nel participaron os mellores nadadores españois en busca de marcas mínimas de participación para o mundial, “co que o nivel do campionato tiña ese plus de competencia que o fixo máis esixente”, explican desde o club.

Así, os resultados dos nadadores lucenses “estiveron ao nivel do esperado, tendo en conta que estamos a principio da tempada e que é un campionato Absoluto”, sosteñen.

Desta maneira, destacan que Martín Vázquez López conseguiu o décimo posto en 50 mariposa, un 13º posto en 100 espalda e un 27º posto en 50 libres.

Pola súa parte, Inés Mourenza Rocha, conseguiu un 10º posto en 200 mariposa; un 12⁰ posto en 1500 libres; un 17º posto en 800 libres; e un 33⁰ posto en 100 mariposa.

Con respecto a Brais Novo López, acadou un 19⁰ posto en 100 braza, un 28⁰ posto en 50 braza e un 40⁰ posto en 50 libres.

Finalmente, Sofía Mourenza Rocha chegou a 6ª posición en 100 braza, a 11ª en 50 braza e 14ª en 200 braza. Ademais, o relevo de 4x50 libres mixto formado polos catro nadadores finalizou no 13⁰ posto.

Así, desde o club sosteñen que estes “resultados meten de cheo ao PortaMiñá na pelexa cos mellores clubs de natación Absoluta nacional”.