CCOO presenta alegacións aos orzamentos municipais de 2026 pola falta de negociación co persoal
Comisiones Obreras en Lugo presentou alegacións ao proxecto de Orzamentos do Concello de Lugo para 2026 ao considerar que a súa elaboración, especialmente no Capítulo I relativo ao persoal, se realizou sen negociación coa representación legal das persoas traballadoras.
A unión comarcal do sindicato denuncia que o goberno municipal aprobou inicialmente as contas sen convocar a Mesa Xeral de Negociación nin facilitar a documentación necesaria para analizar e debater as medidas que afectan ás condicións laborais e retributivas do persoal municipal.
Segundo CCOO, o documento orzamentario inclúe partidas de especial relevancia, como a produtividade, a carreira profesional ou as gratificacións, sen ofrecer explicación suficiente sobre os criterios de distribución, os incrementos previstos nin o impacto real por servizos. Esta falta de información, sinala o sindicato, impide coñecer con transparencia como se pretende repartir unha parte significativa do gasto destinado ao persoal.
A organización sindical lembra tamén que existen cuestións estruturais pendentes que requiren planificación e negociación efectiva, entre elas a actualización e negociación da Relación de Postos de Traballo, a regulación da xornada en servizos especiais, a elaboración e aplicación do Plan de Igualdade ou o reforzo da formación vinculada á carreira profesional.
Para CCOO, non é aceptable que un orzamento municipal que condiciona a organización do traballo e as retribucións do persoal se elabore sen diálogo social nin transparencia. Por este motivo, o sindicato solicita que se retrotraia o procedemento de aprobación das contas no relativo ao Capítulo I e á plantilla para abrir un proceso real de negociación coa representación sindical.
Desde a organización advirten de que o diálogo social non pode quedar á marxe cando se toman decisións que afectan aos dereitos laborais e á organización do persoal que sostén os servizos públicos municipais.