Charo Quicler Group actúa hoxe como antesala do Festival de Jazz
O Festival de Jazz de Lugo, que este ano chegará á súa XXXIII edicación presentará o seu programa este luns, pero mentres tanto, Charo Quicler Group ofrecerá un concerto para ir abrindo boca.
Será hoxe, ás 22.30 horas, no Clavicémbalo, organizado pola asociación Amigos do EscobiJazz.
Charo Quicler estudou canto no Conservatorio Superior da Coruña e posteriormente ampliou os seus estudos en Madrid, sendo elixida por Montserrat Caballé para participar como alumna activa nas súas clases maxistrais.
Tras uns anos na capital, actuando no Teatro Real, Teatro da Zarzuela, Novo Apolo e concertos propios para distintas entidades, decide volver á súa Galicia natal coa intención de crear un proxecto máis íntimo. Durante anos foi a vocalista do grupo La habitación de la Música, co que actuou en varios festivais de jazz, teatros e auditorios de Galicia e co que gravou o seu primeiro disco.
