Clausurado o obradoiro dual Terras do Miño-Ulla I con 20 prazas para desempregados
Rematou o obradoiro dual de emprego Terras do Miño-Ulla I, que se desenvolveu en Portomarín, Palas de Rei e Monterroso, ofrecendo formación teórica e práctica en xardinería e promoción turística a 20 persoas desempregadas da zona. A actividade, financiada pola Consellería de Emprego, Comercio e Emigración con 418.000 euros e promovida polos tres concellos, permitiu ao alumnado mellorar a súa cualificación profesional en sectores con boa saída laboral.
Durante o obradoiro, realizáronse actuacións de interese local, centradas no acondicionamento e mantemento de zonas verdes, como o entorno da Casa do Maior e do centro de saúde en Portomarín, a área recreativa da Peneda e a contorna da Cúpula en Monterroso, así como Os Chacotes e o mercado gandeiro en Palas de Rei, entre outros espazos. No módulo de turismo, desenvolvéronse actividades como a organización de xornadas de promoción turística, a creación dun blog, a sinalización de rutas, a elaboración de placas explicativas e a realización de audioguías do Castelo de Pambre.
O delegado territorial de Lugo, Javier Arias, participou na entrega dos diplomas e destacou que a modalidade dual permite contratar a varios participantes en empresas da contorna, cunha duración mínima de tres meses a xornada completa, facilitando a transición ao mercado laboral.