Comeza a funcionar o novo aparcadoiro do HULA, con 340 novas prazas
![nova parking hula lara mendez](https://lugoxa.com/wp-content/uploads/2023/10/nova-parking-hula-lara-mendez.jpg)
A alcaldesa de Lugo, Lara Méndez, vén de poñer a disposición da cidadanía 340 novas prazas de estacionamento gratuíto na contorna do HULA. O recinto, situado ao carón da entrada principal do centro sanitario, xa está operativo cumprindo os obxectivos, segundo indicou a rexedora, de “mellorar o máximo posible os servizos periféricos dun equipamento tan concorrido como é complexo hospitalario e de dar resposta á reivindicación da cidadanía que segue atopando elevadas as tarifas do parking subterráneo”.
A intervención, que supuxo un investimento municipal de máis de 156.000 euros, consistiu no acondicionamento de dúas parcelas que no seu conxunto suman 11.510 metros cadrados. A súa entrada en funcionamento, lembrou Méndez, eleva a 853 as prazas de aparcamento de balde habilitadas nos últimos anos polo Goberno local na contorna do complexo médico xa que, no seu día, os traballos de repintado das prazas que rodean o edificio permitiron gañan 150 novos espazos na vía pública, mentres que os dous aparcadoiros municipais creados nas inmediacións suman un total de 703 prazas.