Comeza a renovación do céspede artificial da Polvoreira, en Lugo
![Polvoreira](https://lugoxa.com/wp-content/uploads/2024/07/Polvoreira.jpg)
O Concello de Lugo comeza a obra de renovación do céspede artificial da Polvoreira. A rexedora visitou as instalacións, cuxas melloras terán un custo de 169.506,22 euros e foron adxudicadas á empresa Calfensa, acompañada polo concelleiro de Deportes, Jorge Bustos, e representantes dos clubs que utilizan estas instalacións. Durante a visita, informouse aos axentes do tecido asociativo deportivo sobre os detalles da actuación que se vai levar a cabo nun terreo de xogo que cada ano empregan máis de 1.500 cativos e cativas.
A alcaldesa subliñou o compromiso do Goberno local “coa mellora continua das nosas instalacións deportivas para ofrecer as mellores condicións aos nosos cidadáns e deportistas”. Alvarellos asegurou que “este proxecto é un exemplo da nosa dedicación e esforzo por conservar as nosas infraestruturas nun estado óptimo, nunha clara mostra do que afirmamos cando dicimos que Lugo é deporte”.
A adxudicación das obras realizouse por un importe de 169.506,22 euros e os traballos desenvolveranse nas próximas semanas para que os campos estean en óptimas condicións ao inicio da tempada deportiva. A firma que executará as actuacións, Calfensa xa acreditou experiencia nesta labors como demostran renovacións semellantes como a dos campos municipais de As Gándaras, e conta cunha ampla traxectoria no coidado de instalacións deportivas de clubs profesionais.
O concelleiro de Deportes, Jorge Bustos, destacou que “con esta obra, reforzamos o noso apoio ao deporte local e aseguramos que o Campo de A Polvoreira cumpra cos máis altos estándares de calidade. A nosa meta é que os clubs e deportistas poidan gozar destas melloras desde o inicio da tempada.” Ao respecto, Paula Alvarellos puxo en valor “a importancia que ten o tecido asociativo na formación, transmisión de valores e fomento de hábitos saudables entre as novas xeracións”, algo que, según a propia rexedora, “fai ineludible o noso apoio á súa actividade e a atención ás súas necesidades, como pode ser a actuación que imos acometer nestas instalacións”.
Por último, o edil recordou que “coa obra que acometeremos, constátase a vontade do Goberno local de ir renovando na medida do posible as máis de 30 instalacións que cede gratuitamente ao tecido asociativo, fundamentais para que poida desenvolver o seu labor. Ademais, esta actuación é moi precisa polo alto volume de utilización que ten o terreo de xogo ao longo de toda a tempada, todas as semanas.” Os traballos iniciaranse de inmediato, co obxectivo de que o terreo de xogo estea listo para o comezo das competicións e o período lectivo do CEIP das Mercedes.