Comezan as obras de rehabilitación da área recreativa da Peneda en Monterroso
Xa están en marcha as obras de rehabilitación da área recreativa da Peneda do municipio de Monterroso, que inclúen a rehabilitación da cafetería, a instalación dunha pérgola ao seu lado e melloras no acceso á área recreativa.
O obxectivo é mellorar as infraestruturas e poñer en valor este espazo público tan frecuentado polos veciños e visitantes.
O proxecto conta cun orzamento total de 233.744,96 euros. A Xunta de Galicia cofinancia un 70 % das actuacións, achegando 163.642 euros, ademais de ser a encargada de contratar e executar as obras.
O Concello de Monterroso completará o financiamento cun 30 % do orzamento, uns 70.132,96 euros e comprométese á recepción, mantemento e conservación das melloras que pasarán a formar parte do patrimonio público municipal.
A previsión é que as obras estén rematadas para o mes de maio deste ano, permitindo que a área recreativa da Peneda poida ser gozada na súa totalidade por veciños e turistas durante a temporada estival.
Esta intervención enmárcase no Plan Hurbe, unha iniciativa promovida polo Goberno galego para apoiar ás administracións locais no financiamento de diversas intervencións urbanísticas que melloren os espazos públicos.