Comezan as obras do coliving no barrio do Carme
As obras do primeiro coliving artístico municipal de España xa deron comezo. Este espazo pretende “promover o talento e a industria cultural da cidade e potenciar, como unha experiencia turística innovadora, o Camiño Primitivo así como crear un novo espazo ao aire libre para o desenvolvemento de actuacións culturais, que permitirá poñer aínda máis en valor o emblemático barrio do Carme” segundo declarou a alcaldesa Lara Méndez.
O proxecto inclúe a recuperación da que fora a vivenda do pintor e escultor Gómez Pacios e a construción dunha nova edificación que será área expositiva, así como a creación de 3.000 m² de infraestruturas verdes ao seu carón, que se habilitarán como zona cultural aberta a toda a cidadanía e que contará con programación propia.
O obxectivo é recuperar este espazo para que os artistas pasen tempadas e creen interrelacionando as súas disciplinas artísticas, nun proceso que poderán compartir cos peregrinos que percorran o Camiño Primitivo ao seu paso por Lugo. Por iso, a reforma da construción existente, de titularidade municipal, inclúe habitacións e espazos comúns e áreas de traballo e talleres. “Farase de xeito respectuoso co inmoble, conservando os muros e todos os elementos existentes de valor, como o muíño contiguo, actuando só onde se detecten danos ou eivas de habitabilidade”, lembrou a rexedora.
Méndez indicou que o equipamento cultural se ampliará cun novo edificio independente, “que será de madeira e cristal para incrementar a sensación de lixeireza e evitar que resulte invasivo na paisaxe que, á súa vez, actuará como escenario de concertos, teatro e mostra do labor dos e das artistas residentes”.
En canto aos espazos verdes, a alcaldesa incidiu en que o seu deseño dará resposta aos desniveis existentes desde a rolda do Carme á casa para que sexa accesible, polo que se estruturará en bancais creando distintos ambientes onde desenvolver actividades. Así mesmo, a existencia de auga na parcela permitirá canalizala para crear un estanque con vexetación adecuada ao seu redor.
A casa Coliving é un proxecto enmarcado na estratexia DUSI Muramiñae, financiado ao 80% pola Unión Europea, a través dos fondos FEDER, encamiñada a unir a trama urbana de Lugo coa súa contorna fluvial, para acadar unha cidade máis sostible, verde, innovadora e moderna.
As obras, que serán realizadas por Sergonsa Servicios SL, contan cun prazo de execución de 10 meses e un orzamento total de 490.978 euros.