Comezaron os traballos da cuberta do Pazo dos Deportes
Este luns comezaron os traballos de reparación da cuberta do Pazo dos Deportes co obxectivo de paliar as filtracións que se producen con episodios de chuvias fortes. A actuación céntrase nas zonas máis vulnerables do teito, que se recubrirán con lámina asfáltica para evitar que a choiva se filtre.
O vicepresidente da Deputación de Lugo e deputado de Deportes Efrén Castro sinalou que “se trata dunha intervención parcial para tratar de atallar os problemas máis urxentes da cuberta das instalacións nas que, lembrou, se está actuando en varios ámbitos, coa renovación completa da iluminación, que culminamos a finais da tempada pasada, e a instalación de 2.000 novos asentos nas bancadas inferiores, que se completará nas vindeiras semanas”.
O responsábel provincial lembrou que “seguimos avanzando na mellora e modernización do Pazo, con intervencións que temos que facer compatibles, a nivel orzamentario, co apoio económico aos clubs da provincia, e especialmente ao deporte base”.