Concello de Lugo e a Fundación da Construción estudan vías de colaboración
O alcalde de Lugo, Miguel Fernández, valorará posibles vías de colaboración entre a Fundación Laboral da Construción (FLC) e o Concello de Lugo tras a súa primeira visita ás instalacións do centro de formación e prácticas que a fundación mantén nas Arieiras desde o ano 2006, grazas a un convenio coa Fundación San Calixto.
Na súa visita, o alcalde estivo acompañado polo presidente da APEC e secretario da FLC en Galicia, José Manuel Rodríguez Espiñeira. Ambos abordaron a posibilidade de desenvolver iniciativas conxuntas para formar traballadores cualificados que se incorporen a un sector representado por unhas 800 empresas na provincia.
Ademais, tamén estivo acompañado polo concelleiro de Movementos Migratorios, Waldir Sinisterra, quen será o encargado de informar á poboación migrante sobre as oportunidades de empregabilidade que ofrece este centro a través de distintos programas.
Durante o encontro, destacou que esta liña de traballo se enmarca na vontade do Goberno local de paliar a falta de profesionais cualificados no sector da construción, un dos obxectivos tamén compartidos pola APEC. “Paliar esta carencia é favorecer o emprego na cidade, apoiar un sector estratéxico para o crecemento de Lugo e facilitar que a poboación migrante poida asentar aquí o seu proxecto de vida”, sinalou.
Desde o ano 2020 ata abril deste ano, o centro formou a 3.225 persoas, máis do 56 % delas en oficios específicos do sector, un 39 % en seguridade e saúde laboral e un 5 % en tarefas de xestión. Ademais, o departamento de Orientación Laboral da fundación realizou preto de 5.500 entrevistas no mesmo período, como parte dun traballo continuado para mellorar a cualificación e cubrir a demanda de persoal.
Durante a xornada tamén se fixo balance dos programas “Construyendo Empleo” e do Plan Integral de Emprego, que alcanza un índice de inserción laboral de máis do 73 %. Así mesmo, púxose en valor a colaboración con “ONG Rescate Internacional”, a través da cal, desde novembro do ano pasado, 19 persoas migrantes foron formadas en distintas especialidades como revestimentos, formigón e carpintería, logrando que 16 delas accedesen a un emprego, cunha inserción superior ao 84 %.
O edil Waldir Sinisterra asumirá o labor de difusión destes programas entre a poboación migrante, co obxectivo de facilitar a súa incorporación ao mercado laboral en ocupacións altamente demandadas e cunha necesidade crecente de man de obra especializada.