Conclúe en Lugo a Olimpíada de Física, que reuniu a un cento de estudantes
O Pazo de San Marcos acolleu onte a entrega de premios da fase final da XXXIV Olimpíada Española de Física, que reuniu en Lugo un cento de estudantes de Bacharelato de todo o Estado.
A vicepresidenta da Deputación de Lugo Maite Ferreiro presidiu o acto de entrega dos galardóns, con medallas de ouro, prata e bronce e mencións de honra a estudantes coas mellores puntuacións nas probas, que se celebraron o pasado venres na Facultade de Ciencias do Campus Terra.
A área de Cultura colaborou coa Universidade de Santiago de Compostela e a Real Sociedade Española de Física na organización da Olimpíada, que ten como obxectivo fomentar as vocacións científicas e que, pola idade das e dos participantes, serve de ponte entre o ensino secundario e os estudos superiores.
A vicepresidenta da Deputación de Lugo Maite Ferreiro agradeceu a presenza en Lugo a estudantes, titores e familiares, así como os docentes que avaliaron as probas, e sinalou que este tipo de actos “con rapazas e rapaces que están empezando a construír o seu futuro son a mellor carta de presentación para a cidade e para o Campus de Lugo”.
Ademais de participaren nas probas, durante a fin de semana coñeceron as instalacións do Campus Terra e o resto da cidade. Concretamente, o sábado realizarán diferentes actividades turísticas e culturais, con visita ao aeródromo de Rozas, ao castro de Viladonga e percorrido polos puntos emblemáticos da cidade.