Convocan un debate público sobre o futuro da estación de autobuses no Vello Cárcere
O Vello Cárcere de Lugo acollerá este martes 24 de marzo, ás 20:30 horas, un encontro centrado no futuro do espazo que actualmente ocupa a estación de autobuses da cidade.
No acto participarán Rubén Arroxo, en representación do BNG, e Luis Latorre, pola asociación Lugo Monumental, nunha conversa que estará moderada por Carmen Uz, presidenta da Asociación de Prensa de Lugo.
A cita chega nun contexto no que gaña protagonismo o debate sobre as actuacións que se deberán acometer unha vez entre en funcionamento a nova Estación Intermodal e a actual infraestrutura perda a súa utilidade principal. As entidades convocantes coinciden na necesidade de adoptar decisións canto antes para planificar o uso da zona e evitar que o edificio quede pechado, sen actividade e en situación de abandono.
Durante o encontro, Arroxo e Latorre manterán un diálogo de carácter construtivo no que darán a coñecer as únicas propostas formuladas ata o momento, impulsadas polo Bloque Nacionalista Galego e pola Asociación Lugo Monumental. O obxectivo é fomentar a reflexión colectiva e facilitar que a cidadanía coñeza estas iniciativas de cara á futura toma de decisións.
A xornalista Carmen Uz exercerá de moderadora desde unha posición de imparcialidade, garantindo un espazo de diálogo aberto e accesible para o público asistente.