Convocan un taller artístico en Rábade con motivo do centenario
O Concello de Rábade continúa celebrando o seu centenario con diversas actividades culturais. Entre elas destaca o taller artístico que será impartido pola artista visual e fotógrafa Cris Bamio, unha oportunidade única para explorar e expresar a creatividade a través da poesía, a fotografía, a escultura e a pintura.
Este taller, que comezará o 22 de febreiro ás 11:00 horas no Centro Sociocultural, está dirixido a todas aquelas persoas interesadas en descubrir ou desenvolver o seu talento artístico. Ademais, as creacións realizadas polos participantes formarán parte dunha exposición final, converténdose nunha magnífica forma de deixar a súa pegada nesta celebración especial para a vila.
As inscricións están abertas na área de Cultura e Deporte do Concello de Rábade, onde se ofrece máis información. O evento é unha das múltiples actividades que se están levando a cabo para conmemorar os 100 anos do municipio.