Coordinan o dispositivo de seguridade para o partido oficial internacional Sub-21 que acolle o Anxo Carro
A subdelegada do Goberno en Lugo, Olimpia López, presidiu a xunta de seguridade celebrada na Subdelegación do Goberno para coordinar o dispositivo con motivo do partido oficial internacional Sub-21 que disputarán as seleccións de España e San Marino o vindeiro venres, 14 de novembro ás 20.45 horas, no estadio Anxo Carro.
Durante a reunión analizáronse as medidas de seguridade, mobilidade e coordinación necesarias para garantir un desenvolvemento seguro do evento deportivo, que reunirá a numerosos afeccionados.
A subdelegada destacou a excelente colaboración entre as distintas forzas e corpos de seguridade, as administracións e a Real Federación Española de Fútbol, subliñando que “o obxectivo é que a xornada deportiva se desenvolva con total normalidade e seguridade tanto para as afeccións como para a cidadanía”.
O dispositivo incluirá actuacións de vixilancia no estadio e nas súas inmediacións, controis de acceso e medidas específicas de tráfico e emerxencias, co propósito de asegurar o bo desenvolvemento do encontro e unha resposta coordinada ante calquera eventualidade.