Criadores de Sarria, Baleira, Ribadeo e Baralla fixéronse co as xatas na poxa da Fonsagrada
![xatas fonsagrada](https://lugoxa.com/wp-content/uploads/2024/04/xatas-fonsagrada.jpg)
Malia nevar toda a mañá, o mercado ganadeiro da Fonsagrada celebrou unha nova edición da súa tradicional poxa coa adxudicación de catro exemplares cun prezo medio de 2.537 euros.
A neve que caeu practicamente toda a mañá no municipio da Fonsagrada non impediu a celebración da poxa de xatas preñadas de Acruga no mercado gandeiro deste concello, nin que se adxudicasen os catro animais presentados, logrando boas cotizacións, pois o prezo medio alcanzou o 2.537 euros. Si que houbo menos gandeiros que noutras ocasións, e un total de 10 tarxetas retiradas antes do inicio da poxa, todas elas de criadores da provincia lucense.
A primeira das xatas preñadas, procedente do centro de recría da Granxa Gayoso Castro, dependente da Deputación de Lugo, foi a que logrou un maior prezo na venda, ao alcanzar os 3.100 euros. Foi adquirida por unha gandería de Sarria. Seguindo coa orde da poxa, a segunda, terceira e cuarta xatas adxudicáronse por 2.450, 2.400 e 2.200 euros, a criadores con explotacións en Baleira, Ribadeo e Baleira.
A boa xenealoxía é clave á hora de garantir a calidade destes exemplares e en moitas ocasións coñecer este dato fai subir a cotización do animal. Isto ocorreu coa primeira poxa da mañá, cunha xata de 26 meses, preñada do outubro pasado, que se presentaba cunha excelente carta xenealóxica, con Rufino AG e Xeitoso AG, exemplares que destacan, respectivamente, por estar indicados tanto para raza pura como para cruzamento industrial. Ademais, proporcionan crías con boa relación de pese ao nacemento e ao destete, e por tanto logra animais con boa conformación cárnica.
O concello de Láncara será o escenario da próxima gran cita de Acruga, a da Festa da Tenreira Galega, o próximo 1 de maio, un dos eventos máis importantes en canto á exaltación da carne de calidade, na que Acruga sempre estaba presente cunha exposición dos mellores exemplares da Raza Loura Galega. Este ano, por primeira vez, completará a súa participación coa poxa de exemplares, respondendo así á chamada do propio Concello de Láncara e á demanda de exemplares de Raza Rubia Galega por parte dos criadores.