Cs denuncia o "total abandono" do Carril das Hortas en Lugo
A portavoz municipal de Ciudadanos en Lugo, Olga Louzao, instou esta mañá ao Goberno local a actuar con urxencia no Carril das Hortas. Asegura que a vía, cuxo estado foi denunciado pola formación laranxa fai máis dun ano, presenta "un estado vergoñento" no seu último terzo do trazado, que comunica a avenida das Fontiñas coa zona centro da cidade.
"É inadmisible que o Goberno local continúe sen tomar medias no Carril das Hortas. O estado desta vía é un exemplo perfecto da falta de interese do Goberno local polos problemas reais da cidade. Tras máis de dous anos de denuncias por parte da veciñanza da contorna, e a pesar das reiteradas petición por parte do noso grupo municipal ante unha necesidade incuestionable, continúan sen facer absolutamente nada», denuncia Olga Louzao.
Segundo explican desde Ciudadanos, o Carril das Hortas presenta no seu último tramo "serios problemas de seguridade viaria" debido a que a falta de ordenación dos espazos para aparcamento dificulta o tránsito de vehículos e pon en risco a seguridade dos peóns. "Trátase dunha rúa cun elevado tránsito de vehículos xa que dá acceso ao centro da cidade desde a avenida das Fontiñas, a estrada de Fonsagrada ou a zona verde do Rato. Aquí concéntrase un gran número de vehículos procedentes destas vías ou de equipamentos como o Hula. Ademais moitos condutores recorren ás beiravías desta rúa para aparcar buscando solucións ao déficit crónico de aparcamento que sofre a zona da avenida das Fontiñas", sinala concelleira. "É inadmisible que unha vía con estas características presente tal nivel de abandono. Non podemos entender como aínda unha parte do trazado carece de beirarrúas e como non se tomaron medidas para ordenar os espazos para aparcamento", engade Louzao.
Aos problemas de circulatorios e de seguridade viaria únese, din, a falta de mantemento. "Existe un gran número de fochancas por mor da falta de mantemento e o asfalto está realmente mal. Ademais a iluminación é insuficiente o que engade un punto máis de perigosidade para os peóns nas horas con ausencia de luz solar", sinalou a voceira de Ciudadanos.
CRUZAMENTO PERIGOSO COA RÚA PRIMAVERA
O grupo municipal de Ciudadanos en Lugo alerta tamén do risco engadido que supón "o estado de abandono que presenta a intersección coa rúa Primavera onde a falta de visibilidade dificulta a incorporación dos vehículos e supón un perigo para a circulación". A formación laranxa insta ao Goberno local a que proxecte unha reforma integral deste tramo da vía coa máxima urxencia. "Trátase dunha rúa cun valor estratéxico incuestionable na que se debe actuar xa. Existen máis rúas na contorna da avenida das Fontiñas que presentan un estado similar ao de Carril das Horas, pero probablemente esta sexa a máis transitada", concluíu Louzao.