Remata a primeira edición do Curso de Competencias Clave no que se formaron 15 alumnos
A primeira edición do curso de Competencias Clave de Nivel 2 – Matemáticas, Comunicación en Lingua Galega e Comunicación en Lingua Castelá celebrado nas dependencias do Centro de Emprendimiento e Innovación (CEI-Nodus) no marco do programa Lugo Job impulsado polo Concello chegou ao seu fin.
Trátase do novo plan de formación, gratuíto, deseñado polo executivo municipal, co obxectivo de axudar a mellorar a empregabilidade da veciñanza e promover a súa inserción laboral, mediante a formación en competencias clave, coñecementos e capacitación.
A través deste programa, quince alumnos colombianos, venezolanos, africanos e paquistanís, ademais de españois, de idades comprendidas entre os 27 e 63 anos, acadaron as tres competencias clave e, polo tanto, xa están en disposición de acceder a títulos e obradoiros que ata o momento non podían cursar,. De feito, moitos deles xa mostraron o seu interese en realizar un certificado de profesionalidade de Nivel 2 nas próximas semanas.
Esta é unha gran oportunidade de formación. Máis da metade dos alumnos solicitaron tamén a súa inscrición para realizar as probas libres para a obtención do Título de Graduado en Educación Secundaria Obrigatoria (ESO).
O curso de Competencias Clave de Nivel 2 é un dos tres que se está a impartir presencialmente no CEI Nodus. Contará cunha segunda edición, na que participarán outras quince persoas, que comezará o vindeiro luns, 14 de marzo, e finalizará no mes de xuño.
Os outros dous cursos que se están a desenvolver neste centro municipal son o de Atención Sociosanitaria a Persoas Dependentes en Institucións Sociais e Confección e Publicación de Páxinas Web, que permitirán a obtención do Certificado de Profesionalidade de Nivel 2, e no que participan un total de 30 persoas.
FORMACIÓN ADAPTADA Á CONCILIACIÓN FAMILIAR.
A formación presencial está dirixida, exclusivamente, a persoas inscritas como demandantes de emprego. A selección dos candidatos realizouse a través do Servizo de Emprego e as persoas seleccionadas están a recibir unha bolsa formativa mensual, que se corresponde co 75% do IPREM.
Trátase dunha formación adaptada ao horario e curso escolar, pois as sesións teñen lugar de 9:15 a 13:15 horas, e durante as datas nas que non hai clases nos centros educativos, como por exemplo no Nadal, Semana Santa, Entroido, etc., tampouco se imparte formación, co obxectivo de facilitar a conciliación familiar dos e das participantes.
PLATAFORMA ONLINE.
O outro piar no que se sustenta o Lugo Job, posto en marcha pola rexedora, é a formación online a través dunha plataforma de e-learning, á que se pode acceder a través da páxina web www.lugojob.es. A través desta ferramenta, púxose en marcha unha amplísima oferta formativa, que se vai actualizando mensualmente, ofertando ao longo de doce meses cursos relacionados con todas as familias profesionais e as competencias máis demandadas hoxe en día no mercado laboral.
A día de hoxe, preto de 1.000 persoas xa se inscribiron nesta plataforma. Os cursos realizaranse a través dun campus online dispoñible as 24 horas do día, todos os días da semana, para maior comodidade do alumnado. Ademais, pódese acceder dende calquera tipo de dispositivo: tanto ordenador, como tablet ou móbil.Cada unha das accións, incluídas na oferta formativa da plataforma virtual, está titorizada por persoal docente cualificado na materia a impartir.