David González Vázquez completa a súa titulación europea de arbitraxe en Limassol
David González Vázquez, árbitro internacional de karate e director da Escola de Karate Dajankai, participou no Curso Europeo de Arbitraxe e no Campionato de Europa das categorías cadete, júnior e U21, celebrados en Limassol, en Chipre, entre o 2 e o 8 de febreiro.
Durante o desenvolvemento do curso superou con éxito o exame que lle permitiu culminar a súa titulación europea, ao obter os graos de Xuíz A de Kata e Árbitro A de Kumite, a máxima cualificación continental en ambas modalidades. Este novo logro permítelle continuar coa súa progresión cara á titulación mundial, na que xa acumula catro acreditacións e se atopa a só dúas de poñer fin á súa carreira arbitral internacional.
González Vázquez é o único árbitro internacional da historia do karate galego e conta na actualidade con dez titulacións entre europeas e mundiais. Ademais, participou como árbitro no propio Campionato de Europa, nunha convocatoria que supón o seu segundo evento internacional designado pola Real Federación Española de Karate e DA e o seu sexto campionato a nivel internacional.
A súa próxima cita será a Liga Mundial Series A, que se celebrará no mes de abril na Coruña, onde continuará avanzando cara ao seu obxectivo de arbitrar unha final dun Campionato do Mundo absoluto.