Desde a Plataforma Ulloa Viva animan a participar na manifestación convocada para o 15 de decembro
A presidenta da Plataforma Ulloa Viva, Marta Gontá, fixo un chamamento á participación masiva na “histórica manifestación” convocada contra o proxecto da macrocelulosa de Altri o vindeiro 15 de decembro en Compostela.
Nunha charla coloquio organizada polo colectivo Arzúa Viva da Plataforma Ulloa Viva, Gontá explicou o camiño percorrido pola veciñanza das comarcas da Ulloa, O Deza, Terra de Melide e Arzúa nos últimos meses contra o proxecto da multinacional Portuguesa de instalar en Palas de Rei, a que sería a maior fábrica de celulosa soluble de Europa e a cuarta máis grande en todo o mundo.
Nunha charla informativa organizada na Capela da Madanela por Arzúa Viva, a presidenta da Plataforma compartiu palestra co enxeñeiro de Montes da USC Eduardo Corbelle e o catedrático de Xeografía Humana da USC Xosé Manuel Santos Solla, coautores do informe sobre o os impactos do Proxecto Gama presentado en setembro polo Consello da Cultura Galega.
Marta Gontá agradeceulles a todos os expertos que participaron neste informe o seu traballo en nome da Plataforma, e destacou que “as veciñas e veciños sí que leemos e valoramos e agradecemos o voso traballo, porque á veciñanza da Ulloa, o Deza, Terras de Melide e Arzúa vainos a vida, o futuro e a saúde nesto”.
Marta Gontá repasou o percorrido da contestación social arredor da Plataforma Ulloa Viva no último ano, destacando fitos coma a manifestación de máis de 20.000 persoas en Palas de Rei o 26 de maio, os 300 barcos na Ría de Arousa contra Altri un mes despois e as 30.000 persoas arrrodeando San Caetano o 30 de xuño.
Referiuse tamén á campaña en marcha para contestar aos requerimentos da Xunta de Galicia contra as 23.000 alegacións presentadas contra o proxecto de Altri en Palas de Rei. Asegurou que “a Xunta ten que ter claro que non pode tirar ao lixo ningunha alegación” e asegurou que desde a Plataforma “seguiremos loitando para que ao goberno do señor Rueda non lle quede máis remedio que dar a cara e dunha vez por todas escoitar aos cidadáns en vez de servir aos intereses dunha multinacional portuguesa”.
Desde Ulloa Viva, Marta Gontá deixou claro que “seguiremos na loita dicindo alto e claro que non hai trato. Altri non se vai instalar, chegaremos até onde faga falta e chegará o día en que o señor Rueda e o seu goberno nos terán que pedir perdón por non ter estado do noso lado fronte a semellante ameaza”.