Dúas medallas para o Club Lucense de Tiro con Arco nas finais do torneo de Taboadela
Os días 11 e 12 de xaneiro, cinco arqueiros do Club Escola Lucense de Tiro con Arco desprazáronse ao concello de Taboadela, en Ourense, para participar no I Trofeo Memorial Miguel Cid, organizado polo Club Lumelar Tiro con Arco. A competición desenvolveuse cunha fase clasificatoria sobre un máximo de 600 puntos, na que os representantes lucenses lograron destacadas actuacións.
En arco recurvo sénior masculino, Juan Andrés Casaleiro Piña acadou 500 puntos, que lle valeron un 8º posto na clasificatoria e unha medalla de prata na final. Na categoría feminina de arco recurvo sénior, Celia Sánchez Mateos alcanzou 371 puntos e ocupou o 8º posto na clasificatoria.
Pola súa parte, en arco longbow veterano masculino, José Ángel Otero Martínez destacou cun primeiro posto na clasificatoria grazas aos seus 504 puntos, conseguindo tamén a medalla de prata na final. En arco tradicional veterano masculino, Alfonso Fernández Villamiel logrou 437 puntos e un 5º posto na clasificatoria. Finalmente, en arco tradicional sénior feminino, Tamara Reigada García acadou 469 puntos, quedando no 8º posto na clasificatoria e no 5º lugar na final.
Os arqueiros do club lucense demostraron o seu bo nivel nunha competición que congregou participantes de diferentes puntos de Galicia, reafirmando así a súa presenza no panorama galego de tiro con arco.