Deportes

Este torneo reuniu a 94 mozas e mozos que participaron nunha competición que seguiu o sistema suízo a cinco roldas

Celebrouse a entrega de premios do Campionato de Xadrez Xaquedrum, que tivo lugar no soto da Praza de Abastos de Lugo.

Este torneo, dirixido aos estudantes dos centros de ensino medio da cidade, reuniu a 94 mozas e mozos que participaron nunha competición que seguiu o sistema suízo a cinco roldas, con partidas de 10 minutos e un incremento de 3 segundos por xogada.

Os gañadores do Campionato foron premiados segundo o curso no que se encontraban. Na 1º ESO, o primeiro posto foi para Víctor Rouco Rubín. Pola súa parte, no nivel de 2º ESO, o gañador foi Luis Barreiro Rebolo. En 3º ESO, Alexander Valero López foi quen se levou o primeiro premio, mentres que no 4º ESO, o mellor clasificado foi Javier Nigorra Juarez.

No caso dos estudantes de bacharelato, en 1º BAC, o gañador foi novamente Víctor Rouco Rubín, quen conseguiu revalidar o seu éxito na categoría anterior. E por último, no 2º BAC, o primeiro premio foi para Antón Vilariño Lorenzo.

Ademais dos premios individuais, tamén se entregaron os galardóns aos mellores equipos. O IES Ánxel Fole foi o equipo gañador, seguido polo IES Leiras Pulpeiro, que logrou o segundo posto, e o IES Nosa Señora dos Ollos Grandes, que completou o podio ao conseguir o terceiro lugar.

O ciclo de hostalería do IES Sanxillao colaborou coa actividade, ofrecendo pastas e obsequios para todos os participantes. A competición foi individual, pero tamén se tivo en conta o desempeño dos catro mellores xogadores de cada equipo para a clasificación por grupos.

A concelleira de Educación, Iria Buide, destacou o compromiso do Goberno de Lugo por "achegar actividades aos centros educativos, organizando un ano máis estes torneos que se celebran nun espazo tan emblemático como é o soto da Praza de Abastos". Buide subliñou que con esta iniciativa se busca "fomentar a práctica do xadrez e os seus beneficios en capacidades tan importantes como a concentración, a toma de decisións e a creatividade".

A xornada de xadrez foi unha excelente oportunidade para a mocidade lucense de poñer a proba as súas habilidades e reflexos mentais, ao tempo que se promove o deporte e o desenvolvemento educativo en Lugo. Esta actividade reflicte o firme compromiso do Concello de Lugo coa mocidade e a súa formación integral.