Entregados os premios do concurso de tapas da Fonsagrada
Tivo lugar a entrega de premios do XII Concurso de Tapas da Fonsagrada 2025, unha cita consolidada no calendario gastronómico da vila que cada ano atrae a veciños e visitantes para saborear a creatividade e o bo facer da hostalaría local.
Na presente edición, o galardón á tapa co mellor sabor foi para o restaurante O Piñeiral, mentres que o premio á mellor presentación recaeu no Mesón Catro Ventos. Ademais, os dous premios outorgados polo Concello da Fonsagrada, consistentes en dúas cestas de produtos locais, foron para Nazaret Carrín Fernández e Elías Fernández Álvarez.
Dende o Concello da Fonsagrada quixeron agradecer a participación de todos os establecementos nesta doce edición e tamén a resposta do público, que acudiu un ano máis a apoiar e degustar a riqueza da gastronomía local. Finalmente, trasladaron os seus parabéns ás persoas premiadas, destacando o éxito desta iniciativa que une cultura, turismo e tradición.