Estudantes de Bacharelato e FP cos mellores expedientes foron recoñecidos pola USC no Campus de Lugo
Máis de 200 alumnos e alumnas que accederon á universidade cun expediente excelente celebraron o seu esforzo nun acto que puxo en valor a educación pública e a Formación Profesional como porta de acceso ao ensino superior.
O esforzo, a disciplina e a capacidade de superación de máis de 200 estudantes galegos tiveron o seu recoñecemento no Campus Terra da Universidade de Santiago. O auditorio da Facultade de Veterinaria acolleu un emotivo acto no que foron homenaxeados os alumnos e alumnas que acadaron notas sobresaíntes na proba de acceso á universidade (ABAU) logo de completar o Bacharelato ou un ciclo superior de Formación Profesional.
Entre os 131 estudantes que asistiron ao evento, celebrado no marco do programa A ponte entre o ensino medio e a USC, houbo emoción contida, discursos que puxeron o foco na excelencia académica e no valor de apostar por itinerarios diversos cara á universidade. A USC destacou a crecente relevancia da FP como unha vía sólida e completa para acceder aos estudos universitarios, unha idea subliñada polo propio reitor, Antonio López Díaz, quen cualificou estes traxectos formativos como “vasos comunicantes de riqueza e oportunidade”.
O alumnado, representado por Antonio Poceiro do IES Frei Martín Sarmiento, puxo voz ao orgullo e á ilusión de todo un colectivo que ve na universidade o seguinte chanzo da súa formación. Xunto a el, a docente Carolina Varela do IES Lamas de Abade enxalzou o papel do profesorado e das familias no acompañamento académico.
O acto contou coa participación de representantes institucionais, entre eles o presidente da Deputación de Lugo, José Tomé, quen fixo un recoñecemento especial á Formación Profesional como “vía xeradora de emprego, innovación e oportunidades”, e insistiu na necesidade de reforzar o ensino público como ferramenta de equidade. O delegado da Xunta, Javier Arias, puxo tamén en valor o dinamismo da FP galega, que ofrecerá o vindeiro curso novas titulacións pioneiras en centros da provincia de Lugo como o CIFP As Mercedes ou o IES Muralla Romana.
O evento foi, sobre todo, unha celebración dos logros dun alumnado que, desde distintos camiños, demostra que a excelencia académica tamén é posible dende a diversidade de itinerarios educativos e que o futuro universitario está cada vez máis aberto a talentos que veñen de percorridos distintos pero igualmente valiosos.