Estudantes do IES Muralla Romana representarán a Galicia no concurso de programación ProgramaMe
O tenente alcalde do Concello de Lugo, Rubén Arroxo, xunto coa concelleira de Educación e Difusión do Coñecemento, Iria Buide, recibiron no Concello aos estudantes do IES Muralla Romana que resultaron gañadores da primeira fase do concurso estatal de programación para centros de FP, ProgramaMe. O equipo representará a Galicia na fase final, que se celebrará de xeito presencial na Universidade Complutense de Madrid.
Os concelleiros parabenizaron ao grupo formado por Juan David Artunduaga, Brais Darriba e Xoán Sangiao, que acudiron á recepción acompañados polo profesor de programación Alberto Barreira e a xefa do departamento de Informática, Esther López.
O equipo conseguiu o primeiro posto entre os 96 grupos participantes de todo o Estado, un logro destacable para o centro lucense, que contou cun total de tres equipos na competición.
Puxeron en valor o talento dos estudantes, destacando que Lugo conta xa “cun grupo dos mellores programadores do Estado”. Ademais, trasladaron o seu apoio ao equipo de cara á fase final estatal, onde competirán contra os mellores centros de formación profesional de España.
Con esta vitoria, o equipo do IES Muralla Romana sitúase como un referente da programación a nivel estatal e terá a oportunidade de demostrar o seu talento na gran final de Madrid.