Éxito da Oficina Móbil da Atención ao Peregrino que funciona desde o verán
A subdelegada do Goberno, Isabel Rodríguez, aplaudiu o traballo realizado este verán polas Forzas e Corpos de Seguridade do Estado para protexer o Camiño de Santiago e remarcou especialmente o esforzo realizado pola Garda Civil coa creación dunha Oficina Móbil de Atención aos peregrinos que viaxan a Compostela polo Camiño Francés. A subdelegada agradeceu o seu traballo durante unha visita que efectuou esta mañá ao Cebreiro, na que estivo acompañada polo alcalde de Pedrafita, José Luis Raposo.
Isabel Rodríguez destacou o éxito da Oficina Móbil de Atención ao Peregrino da Garda Civil, unha iniciativa que se desenvolveu por primeira vez este verán e que foi moi ben acollida polos peregrinos aos que se brindaron servizos de atención policial no propio Camiño.
A subdelegada lembrou que a creación da Oficina Móbil de Atención aos Peregrinos da Garda Civil foi incluída no Plan de Seguridade do Xacobeo e obedeceu ao compromiso que mantén o Goberno coa revitalización do Camiño de Santiago.
“A protección dos peregrinos foi fundamental para asegurar a reactivación do Camiño e quero darlle as grazas á Garda Civil, que fixo un labor extraordinario e volveu ser exemplo da importancia dos servizos públicos. O esforzo foi moi importante, pero pagou a pena porque serviu para reforzar a seguridade e a protección dos peregrinos”, manifestou Rodríguez.
A subdelegada destacou que “unha vez máis, a Garda Civil volveu dar exemplo de servizo público coa posta en marcha desta Oficina Móbil que, supuxo un esforzo extraordinario, pero pagou a pena pois serviu para reforzar a seguridade e a protección dos peregrinos”. De feito, explicou que o bo servizo prestado pola Oficina Móbil fixo que se prorrogara o seu funcionamento máis aló do verán e está previsto que se manteña operativa ata o vindeiro día 12 de outubro.
A OMAP é un vehículo acondicionado para funcionar como oficina itinerante, na que os axentes da Garda Civil dispoñen dos medios necesarios para dar atención e auxiliar aos peregrinos que requiren dos seus servizos.
Os axentes que percorren coa Oficina Móbil o Camiño Francés ao seu paso pola provincia desde comezos do verán poden tramitar denuncias, así como proporcionar información e asesoramento policial aos peregrinos. Así, entre o 1 de xullo e o 30 de setembro, desde a OMAP prestáronse 3.851 auxilios a peregrinos, 1.483 a peregrinos estranxeiros.
Entre os servizos prestados figura a participación da Oficina Móbil no dispositivo de busca dun neno de 10 anos que desapareceu, a finais do mes de xullo, cando realizaba o Camiño cos seus pais e foi localizado no lugar de Ventas de Narón, no concello de Portomarín. Neste servizo contouse coa colaboración de dous axentes de policía da Alemaña incorporados ao Plan de Seguridade, así como de unha patrulla do posto de Monterroso.
Outro servizo relevante no que participaron os membros da Oficina Móbil foi un dispositivo que se estableceu, no mes de agosto, na etapa de Sarria a Portomarín contra tres persoas que foron denunciadas por molestar aos peregrinos, aos que pedían cartos facéndose pasar por voluntarios dunha entidade social.