Finaliza a restauración do caneiro da Acea de Olga para protexer o río Miño
O alcalde de Lugo, Miguel Fernández, e o presidente da Confederación Hidrográfica Miño-Sil, José Antonio Quiroga, supervisaron a restauración do caneiro da Acea de Olga, unha das actuacións máis recentes para recuperar e poñer en valor o patrimonio fluvial do río Miño ao seu paso pola cidade.
A obra completada garante a conservación do ecosistema fluvial, combina tradición e modernidade e asegura un uso social deste emblemático tramo do río. Fernández destacou o compromiso e a colaboración activa da Confederación, que fixeron posible avanzar nunha estratexia conxunta orientada a recuperar o valor ambiental, cultural e social do río e da súa contorna. “Lugo consolídase como unha cidade que mira ao río con respecto e con futuro. Seguiremos traballando da man da Confederación e doutras administracións para que siga sendo un espazo de encontro, patrimonio e futuro”, afirmou o rexedor.
O alcalde lembrou que esta actuación se suma a outros proxectos compartidos que están a transformar o borde fluvial da cidade e a crear un auténtico cinto verde arredor de Lugo, como a conexión dos paseos do Rato e do Miño, que permitirá completar un itinerario natural e peonil continuo, ou a rehabilitación da antiga Fábrica da Luz, que se converterá nun centro de interpretación vinculado á memoria industrial e ao aproveitamento sostible dos recursos naturais. Ademais, salientou proxectos en marcha como o deseño da futura praia fluvial e a posta en valor do entorno da Fábrica da Luz, que será un polo de atracción ambiental e cultural.
Pola súa banda, José Antonio Quiroga destacou a magnitude e dificultade da obra, de oito metros de longo e máis de 40 de ancho, que permite que a dinámica hidráulica xere diferentes correntes e que as especies de peixe, independentemente do seu tamaño, poidan cruzar o río sen dificultade. “É un traballo executado con man de obra especializada que respecta a forma tradicional destas actuacións de enxeñería”, indicou.
O caneiro da Acea de Olga ten un valor singular dende o punto de vista etnográfico, histórico, científico e ambiental. Estas estruturas foron clave durante séculos para regular o caudal do río, favorecer o uso sostible da auga e garantir diferentes funcións do Miño. A restauración permite recuperar a súa función orixinal, mellorar a seguridade fronte a posibles desbordamentos e manter o equilibrio hidrolóxico necesario para a estabilidade do ecosistema fluvial e da contorna urbana.
Quiroga tamén subliñou o valor social do proxecto, xa que contribúe á práctica deportiva, mantén a lámina de auga á altura da ponte Romana e recupera un elemento esencial na dinámica do río e na cidade. Con esta actuación, Lugo reafirma a súa aposta por un modelo de cidade sostible, integradora e respectuosa co seu entorno natural.