Friol acollerá as sétimas xornadas de dinamización do medio rural
Tras tres anos sen celebrarse regresan esta fin de semana a localidade friolesa de Carballo as Xornadas de Interpretación e Dinaminación do Medio Rural, que terá lugar estes sábado, 29 de abril, organizadas pola Asociación Cultural Carballo Vivo.
Estas xornadas, que chegan á súa oitava edición, pretenden contribuír a promover o interese pola cultura e tradicións dos diferentes lugares que forman o Concello de Friol, ademais de supor unha oportunidade para analizar a situación do rural e poder coñecer experiencias e estratexias que permitan contribuír a impulsar iniciativas de desenvolvemento cultural, social e económico.
Entre os obxectivos desta xornadas figuran proporcionar espazos de encontro, intercambio e formación entre os veciños para afondar no coñecemento da historia e patrimonio. A integración de todos os colectivos é tamén un dos eixes destas xornadas, que están abertas a todos os públicos.
O centro social de Carballo acollerá a programación, que dará comezo ás 11.30 horas para falar de hábitos saudables para mellorar a circulación, con dous especialistas médicos de prestixio. Ás 17.00 horas, o xerente da cooperativa A Carqueixa, Román Sáchez Besteiro, fará unha exposición do que supón esta iniciativa xerando valor para o campo.
Continuará a sesión falando de autoconsumo colectivo e comunidades enerxéticas para loitar contra o prezo da luz. Estará a charla ao cargo de Xosé Manuel Golpe, consultor especializado.
Sobre as 20.00 horas daranse por concluídas as ponencias cuns petiscos e unha foliada, da que se ocupará Xesta Verde. Ás 21.00 horas, como colofón, está previsto un roteiro nocturno polos montes de Carballo ao encontro do lobo.
