Friol prepara para o 25 a Feira do Cabalo
O Concello de Friol acollerá o vindeiro domingo 25 de maio unha nova edición da tradicional Feira do Cabalo, unha das citas ecuestres máis destacadas da comarca. A xornada comezará ás 8:30 horas coa apertura do recinto feiral e continuará ás 9:00 coa compra e venda de gando equino, unha das actividades máis esperadas polos asistentes.
A partir das 9:30 darán comezo os concursos morfolóxicos, nos que se avaliarán exemplares de distintas razas e idades, cunha sección especial para potros de ata dous anos e outra para exemplares adultos. As probas incluirán categorías como PRG, cruzados, PRE e PRA, que se desenvolverán ao longo de toda a mañá e parte da tarde.
Ás 11:30 terá lugar a andadura tradicional galega, nas modalidades serrada e chapeada, e xa pola tarde, a partir das 15:30, celebraranse as probas de andadura libre, con catro categorías que inclúen andadura chapeada e serrada con distintos niveis de dificultade e premios especiais.
Como colofón á feira, ás 19:00 está previsto un gran espectáculo ecuestre a cargo do recoñecido profesional Paco Martos, que promete emocionar ao público cunha exhibición de doma e habilidade.
A xornada rematará ás 20:30 coa entrega de premios e un gran sorteo. Haberá trofeos e premios en metálico para os mellores exemplares e participantes, así como agasallos especiais como sacos de penso e recoñecementos ao propietario con maior número de animais inscritos.
O prazo para inscribirse nas probas remata o 22 de maio e espérase unha alta participación tanto de criadores como de público xeral. O evento está organizado polo Concello de Friol, que convida a toda a veciñanza e visitantes a desfrutar dun día de festa, tradición e paixón polo mundo ecuestre.
