Galicia énchese de paraugas pola inclusión no 10º aniversario de 'Baixo o Mesmo Paraugas'
Galicia volverá encherse de paraugas de cores o vindeiro mércores 3 de decembro con motivo da décima edición de 'Baixo o Mesmo Paraugas', a iniciativa que une a máis de cen entidades de discapacidade de toda a comunidade para celebrar de maneira conxunta o Día Internacional das Persoas con Discapacidade baixo unha mensaxe común: unha sociedade plural, diversa e inclusiva, na que todas as persoas teñen moito que achegar.
O movemento, iniciado na Coruña no ano 2016, consolidouse nesta década como un símbolo de unidade do tecido asociativo e como escaparate das reivindicacións e da realidade cotiá das persoas con discapacidade e das súas familias.
Este ano, coincidindo cos dez anos da iniciativa, as entidades organizan marchas e concentracións con paraugas en distintos puntos de Galicia, co obxectivo de facer visible no espazo público a forza deste movemento. Entre as convocatorias previstas están:
- A Coruña, ás 11.30 horas, na explanada do Parrote (con marcha)
- Lugo, ás 12.00 horas, na Praza Maior (con marcha)
- Ourense, ás 11.30 horas, no Parque de San Lázaro (con marcha)
- Pontevedra, ás 12.00 horas, na Praza da Peregrina
- Santiago de Compostela, ás 12.00 horas, na Praza do Obradoiro
- Vigo, ás 11.00 horas, xunto ao edificio da Xunta de Galicia (con marcha)
- Cee, ás 12.00 horas, na Praza 8 de Marzo
- Ribeira, ás 10.30 horas, na Praza de España (con marcha)
- Porto do Son, ás 10.30 horas, no porto (con marcha)
- A Pobra do Caramiñal, ás 10.30 horas, na Praza do Museo de Valle-Inclán (con marcha)
Na Coruña, a marcha partirá do Parrote ás 11.30 horas e discorrerá por Riego de Agua e Luchana, cruzará a avenida da Marina e regresará ao punto de partida pola zona peonil da avenida do Porto.
A campaña deste ano leva por lema '#Xente10' e busca poñer o foco nas capacidades, e non nas limitacións, das persoas con discapacidade, visibilizando que son 'xente 10' para traballar, estudar, divertirse, cociñar, conducir, practicar deporte ou levar unha vida autónoma, igual que o resto da cidadanía.
Ricardo Iglesias, portavoz das entidades organizadoras, chamou a toda a poboación a sumarse á celebración co seu paraugas. Lembrou que a iniciativa non só implica ás persoas con discapacidade, senón tamén ás súas familias, profesionais, voluntariado e a unha ampla base social que supera as 50.000 persoas en toda Galicia a través das máis de 100 entidades participantes.
Ademais dos actos presenciais, 'Baixo o Mesmo Paraugas' promove tamén unha acción nas redes sociais: o 3 de decembro animan a subir unha foto cun paraugas de cores e unha mensaxe positiva, empregando as etiquetas '#BaixoOMesmoParaugas' e '#Xente10' e etiquetando o perfil @galiciadiversa, co obxectivo de estender a mensaxe de inclusión a todo o territorio.
O símbolo escollido desde os seus inicios, o paraugas, representa a idea de acollida e protección compartida: baixo el caben todas as persoas, sen diferenzas, cun mesmo desexo compartido, construír unha sociedade máis xusta, máis accesible e máis humana.