Iago López, nova incorporación do CD Lugo
O Club Deportivo Lugo e o futbolista Iago López alcanzaron un acordo para a súa incorporación ao primeiro equipo para a tempada 2025/26.
Iago López (Lugo, 1999) regresa á que foi a súa casa. Formado nas categorías inferiores do club, o defensa lucense volve ao Anxo Carro para vestir a camiseta do equipo da súa cidade, achegando compromiso, experiencia e identidade ao vestiario albivermello.
A pesar da súa mocidade, Iago suma xa preto de 100 partidos en Segunda División, competindo a alto nivel en equipos como a UD Logroñés, o CD Mirandés ou a AD Alcorcón. Na última campaña viviu a súa primeira experiencia internacional, defendendo as cores do CS U Craiova da Primeira División romanesa.
Iago López é un defensa versátil, cunha traxectoria contrastada e un forte vínculo emocional co club e a cidade, que o converten nun reforzo especial para o novo proxecto albivermello. O xogador asina por unha tempada, máis outra opcional en función de obxectivos. A data da súa presentación oficial comunicarase proximamente.