Improdutivas pecha o ano con funcións improvisadas en Lugo e Castroverde

O grupo actuará no Clavicémbalo os días 11 e 12 antes de clausurar o ciclo da Deputación en Castroverde o sábado 13

O grupo teatral Improdutivas culmina esta semana a súa actividade anual cunha serie de funcións improvisadas que os levarán por Lugo e Castroverde dentro do Ciclo de Teatro Amador da Deputación de Lugo.

A compañía iniciará esta pequena xira o xoves 11, ás 22 horas, cunha actuación no Clavicémbalo, onde repetirán presenza ao día seguinte, o venres 12, para colaborar con As Teimas, coñecidas como as raíñas da improvisación e chegadas desde Santiago para compartir escenario e trasladar os seus mellores desexos.

Como peche desta programación, Improdutivas ofrecerá a súa función o sábado 13 ás 18:30 horas no Centro sociocultural Paco Pestana de Castroverde, onde despedirán o ano cun espectáculo marcado pola espontaneidade e o humor.