Infraestruturas actúa no parque da Rolda do Carme para mellorar a accesibilidade
![obras accesibilidade rolda do carme](https://lugoxa.com/wp-content/uploads/2021/09/obras-accesibilidade-rolda-do-carme.jpg)
O concelleiro de Infraestruturas Urbanas, Alexandre Penas, informou dos traballos que se están a realizar no parque da Rolda do Carme, na unión desta rúa coa Fonte dos Ranchos. Alexandre Penas explicou que “estamos a traballar na mellora da pavimentación desta zona verde, debido a que o crecemento das árbores produciron levantamentos no chan presente ata o momento”.
A solución adoptada pola concellería de Infraestruturas consiste na aplicación dunha nova pavimentación na zona de tránsito peonil do parque “para garantir a maior accesibilidade para a veciñanza, especialmente no caso de persoas de mobilidade reducida”, segundo declarou Alexandre Penas.
O concelleiro de Infraestruturas afirmou que “damos solución a unha reclamación importante para a veciñanza desta zona da cidade” e destacou o papel da veciñanza á hora de planificar o traballo da concellería de Infraestruturas. “As veciñas e veciños coñecen de primeira man a zona na que viven e as súas reclamacións e solicitudes serven para planificar o noso traballo”, explicou Alexandre Penas.