Investirán 419.000 euros en completar a renovación das beirarrúas de Castro Ribeiras de Lea
![licitacion ultima fase beirarruas castro ribieras de lea](https://lugoxa.com/wp-content/uploads/2021/12/licitacion-ultima-fase-beirarruas-castro-ribieras-de-lea.jpg)
A Consellería de Infraestruturas e Mobilidade licitou hoxe as obras de renovación de beirarrúas en Castro Ribeiras de Lea, no municipio de Castro de Rei, en preto dun quilómetro de lonxitude dende o centro -á altura da Praza de Galicia- ata a saída do núcleo urbano en sentido Abadín.
O orzamento de licitación ascende a 419.472 euros e o prazo máximo previsto de execución será de oito meses. As empresas interesadas na execución destes traballos teñen de prazo ata o 27 de decembro para presentar as súas ofertas.
A actuación realizarase na travesía da estrada autonómica LU-113, en concreto entre os puntos quilométricos 5,070 e 6, e vén a completar os traballos realizados o pasado ano no tramo comprendido entre os quilómetros 3,820 -á altura do camposanto, preto de Duarría- e 5,070, cun investimento de 266.500 euros. En total, a Xunta destina 686.000 euros á renovación integral acometida nas dúas fases.
As novas beirarrúas construiranse cunha anchura igual ou superior a 1,80 metros en toda a lonxitude. Regularizarase a superficie e estenderase unha nova capa de zahorra e outra de formigón, sobre a que se asentará a baldosa hidráulica antideslizante. Ampliaranse e trasladaranse os sumidoiros ás zonas de ampliación e tamén se mellorarán os accesos aos garaxes, entre outras medidas.
Segundo indicaron dende a Xunta, esta actuación “mellorará a seguridade para os peóns, especialmente nos puntos que se ensanchan porque presentaban dificultade de paso para as persoas con mobilidade reducida ou carros de bebé, entre outros supostos”. Neste sentido, indicou que o tránsito peonil en ambas marxes da travesía é moi intenso porque acolle numerosos servizos, comercios e dotacións, “o que fai necesario proporcionar á poboación estruturas de paso en bo estado, que permitan unha circulación segura, illada dos vehículos, nas axeitadas condicións de accesibilidade, comodidade e estética”.