Ítaca Teatro leva “Alma de grilo” á igrexa de San Miguel de Eiré de Pantón o 19 de outubro
A compañía lucense Ítaca Teatro regresa a Pantón este domingo 19 de outubro para presentar Alma de grilo, unha proposta escénica que mestura teatro, música e narración nun marco tan singular como a igrexa románica de San Miguel de Eiré.
A función, organizada polo Concello de Pantón e patrocinada pola Deputación de Lugo a través da súa Vicepresidencia de Cultura, forma parte da programación do Circuíto de Teatro Profesional e dará comezo ás 17:00 horas.
A actriz e autora María García é a protagonista desta peza, inspirada no seu propio libro homónimo, no que se recollen relatos marcados por un ton poético e un fondo próximo ao realismo máxico. A través do canto dos grilos, que actúa como fío condutor, a intérprete percorre historias nas que a fraxilidade se transforma en afouteza, a cobiza xera incomunicación e a imaxinación convértese nun refuxio fronte á soidade.
A acompañan a música orixinal de Vadim Yukhnevich e a dirección de José Campanari, quen dá forma a un espectáculo concibido para espazos non convencionais, como o da igrexa de San Miguel de Eiré, que reforza a atmosfera íntima e simbólica desta montaxe.
Alma de grilo propón así unha experiencia teatral que invita á reflexión sobre a natureza humana e as súas contradicións, cunha posta en escena delicada e profundamente emocional.