Ítaca Teatro leva Cinco minutos sen respirar a Meira e A Fonsagrada
A compañía lucense Ítaca Teatro levará a escena Cinco minutos sen respirar o sábado 15 de novembro, ás 19:00 horas, na Casa da Cultura Federico González López de Meira, e o domingo 16, ás 18:00 horas, no Salón de Actos Municipal Os Chaos da Fonsagrada. Ambas funcións forman parte do Programa de Teatro Profesional 2025 organizado pola Vicepresidencia da Deputación de Lugo.
Fundada por Elea López e Carlos Rebolo, Ítaca Teatro continúa a súa traxectoria coa exitosa montaxe desta adaptación da obra homónima do dramaturgo venezolano Gustavo Ott, baixo a dirección de Carlos Neira. O grupo, que xa participou en diversos circuítos e programas culturais —como o Circuíto de Teatro Profesional da Deputación de Lugo ou as actividades do 25N contra a violencia de xénero—, presenta agora esta peza que afonda na necesidade humana de imaxinar ficcións para fuxir da realidade.
Cinco minutos sen respirar explora temas como as segundas oportunidades, a procura do amor a través da solidariedade e o papel liberador da literatura fronte ao abuso. No escenario, Margarita, unha exempregada de banca, e Víctor, supervisor nun supermercado —interpretados polos propios fundadores da compañía—, buscan algo de poesía que dea sentido e dignidade ás súas vidas.
O espectáculo, representado xa en numerosos municipios galegos, combina o drama e a esperanza nunha reflexión intimista e universal sobre as ilusións, os reencontros e a capacidade de reinventarse. As funcións en Meira e A Fonsagrada ofrecerán ao público unha nova oportunidade de gozar desta proposta teatral que mestura emoción, humor e compromiso social.