Javier Arias felicitou ao piloto José Alonso Liste polos bos resultados obtidos esta tempada
O delegado territorial da Xunta en Lugo, Javier Arias, felicitou ao piloto José Alonso Liste polos bos resultados obtidos esta tempada nas probas de rally de Montaña nas que participou, como a celebrada o pasado mes en Mallorca Pujada Puig Major, onde dominou na categoría de turismos.
Ambos puxeron en valor a colaboración do Centro Integrado de Formación Profesional (CIFP) das Mercedes na posta a punto do seu vehículo Ginetta G55 Gt4, que cada ano é mellorado polo profesorado e alumnado das especialidades de motor e está a demostrar ser moi competitivo.
Liste tamén compite en ocasións cun vehículo de Fórmula 3, modelo Dallara F3, creado polo ciclo superior dual de Automoción especializado en vehículos de competición do citado centro, unha titulación que se estreou o pasado curso en Galicia.