Deportes

O novo pivote destaca "polo seu físico, a súa capacidade de intimidación e rebote, tanto en ataque como en defensa, o seu xogo por encima do aro e a súa capacidade para finalizar"

O Club Baloncesto Río Breogán vén de fichar ao xogador nixeriano John Egbunu na posición de pivote, co que se reforzará o xogo interior do equipo.

O novo pivote celeste destaca "polo seu físico, cunha gran envergadura, a súa capacidade de intimidación e rebote, tanto en ataque como en defensa, o seu xogo por encima do aro e a súa capacidade para finalizar", explican desde o Club.

Este xogador, de 2,11 metros de altura e 30 anos, formouse na Florida (NCAA), antes de formar parte do equipo de liga de desenvolvemento NBA, Long Islad Nets, na campaña 2019/20, promediando 10,3 puntos, 7,4 rebotes e 1,3 tapóns.

O seu seguinte destino foi Corea e, tras un período curto, desembarcou en Italia, onde promediou na 2021/22, 8,4 puntos, 7,6 rebotes e 1,5 tapóns. Na súa segunda campaña asinou 11 puntos e 9,4 rebotes (5° en rebotes na Lega), antes de fichar por Hapoel Jerusalen, onde se proclamou campión da liga regular promediando 7,5 puntos e 4,7 rebotes.

A súa seguinte parada profesional foi no Gaziantep Basketbol turco, alcanzando unhas medias de 11,5 puntos, 7,6 rebotes e 1,3 tapóns, sendo o terceiro taponador da liga.

Tras a súa experiencia en Turquía, fichou polo ASVEL Villerbanne francés (Liga Francesa e Euroliga), onde compartiu xogo interior con Youssoupha Fall, xogando 15 partidos en Euroliga con Asvel e con medias de 2,9 puntos e 2,5 rebotes en 12 minutos, antes de desembarcar en China. Na tempada 23/24, cos Ningbo Rockets firma 15,3 puntos e 11,7 rebotes.

Agora, o xogador chega ao Lugo procedente do Xangai Sharks, equipo no que disputou 5 encontros.