José Álvarez Flores, novo coordinador de Ciudadanos en Lugo
Ciudadanos vén de elixir a José Álvarez Flores como coordinador da formación en Lugo. Manuel Vicente foi designado para a mesma labor na Mariña.
Estes nomeamentos encádranse nun proceso de renovación de Ciudadanos en toda Galicia. De feito, ademais de para Lugo e A Mariña, a formación laranxa elixiu o xoves as súas xuntas directivas para Vigo, A Coruña, Pontevedra, Ourense e Santiago, así como nos concellos pontevedreses de A Lama, A Guarda e Vilagarcía de Arousa e nos coruñeses de Oleiros, Cambre e Cee.
Segundo explican desde Ciudadanos, o seu obxectivo é "seguir traballando" coa vista posta nas eleccións municipais de 2023. "O partido quere aprender dos erros cometidos no pasado para dar cabida a un proxecto liberal e progresista nas corporacións locais dos concellos", afirman.