José Ramón Gómez Besteiro sobre o PSOE en Lugo: "Crecemos máis ca Unión Europea"
O Comité Provincial celebrado en Lugo pechou a sesión coa renovación da Comisión de Listas do PSdeG na provincia de Lugo, ratificada por aclamación. Os membros deste órgano son Pilar García Porto, Ana María Abelleira, José Luis Pajón, Gloria Prada, Miguel Ángel Crende, Marina Ramudo, Roberto Fernández Rico, Silvia Rodríguez Díaz, Darío Antonio Piñeiro, Sonia Verdes e Miguel González Vilela.
O secretario xeral do PSdeG, José Ramón Gómez Besteiro, que alí estivo, fixo un chamamento á unidade interna e ao impulso político durante a súa intervención no comité provincial celebrado en Lugo, un acto no que defendeu que o partido inicia un novo ciclo no que resulta imprescindible “acadar velocidade de cruceiro” e activar ao máximo os proxectos municipais. Contrapuxo esta dinámica á que atribúe ao Partido Popular, ao que acusou de aparecer só “para a foto” e de empregar a provincia como un “decorado electoral” que posteriormente abandona.
Besteiro subliñou que este é o primeiro comité provincial tras o proceso de primarias, un exercicio no que, segundo lembrou, a militancia se expresou democraticamente e no que agora corresponde demostrar unidade plena. Recordou tamén que os grandes avances do socialismo en Lugo, como o histórico acceso á Deputación hai vinte anos ou a consolidación dun proxecto provincial sólido, foron resultado dun traballo colectivo e continuado. “Da unidade nacen os proxectos fortes e medran os proxectos que perduran”, afirmou.
O líder socialista puxo en valor a responsabilidade institucional do PSdeG nos concellos da provincia e no conxunto de Galicia, onde alcaldes e alcaldesas socialistas representan os intereses de máis do sesenta por cento da poboación. Destacou que existen numerosos exemplos de “boa xestión municipal”, tanto en concellos pequenos cun labor diario admirable como en cidades que avanzan con proxectos solventes, e insistiu en que é necesario “presumir” dese traballo porque é “o mellor aval ante a cidadanía”.
No eido crítico, acusou ao PP de someter Lugo a décadas de abandono, citando a falta de vivenda pública, os retrocesos en materia sanitaria, a desatención á dependencia, a inacción forestal, a ausencia dunha política industrial efectiva e o que definiu como un total desleixo coa PAC. “O PP non planifica, non inviste e non defende esta provincia”, remarcou.
Neste punto situou o proxecto de Altri, que cualificou como un “proxecto absolutamente fallido”. Lembrou que non dispón das garantías ambientais nin económicas precisas, que non conta coas axudas europeas comprometidas e que carece da conexión eléctrica necesaria. “Lugo non queda desenchufado. Quen queda desenchufado é Altri, un proxecto que non é bo nin para esta provincia nin para a economía do país”, concluíu.
Besteiro advertiu ademais de que a dereita busca desgastar ao PSOE mediante ataques persoais porque, ao seu xuízo, non soporta que un goberno socialista faga avanzar o país. Defendeu que España “crece máis ca Unión Europea, reparte mellor a riqueza e protexe ás persoas nas crises”, un modelo que, dixo, incomoda ás formacións conservadoras.
O secretario xeral apelou á tradición histórica do socialismo e aos retos actuais: consolidar a educación e a sanidade públicas, reforzar a dependencia, impulsar a vivenda pública e garantir a mobilidade como dereito. “Somos un partido con 146 anos de historia, un partido que sempre estivo aí, e tocounos levantar este país moitas veces. Témolo que seguir facendo”, afirmou.
Finalmente, reclamou traballo constante de cara ás eleccións municipais de 2027 e insistiu en que o partido debe mostrar “utilidade” onde goberna e explicar con claridade o seu proxecto onde está na oposición. “Unidos somos unha forza enorme”, concluíu.
JOSÉ TOMÉ ROCA
Pola súa parte, o secretario xeral Provincial do PSdeG, José Tomé Roca, apelou a fortalecer a acción territorial e o traballo municipal nunha etapa que definiu como decisiva para o futuro político da provincia. Durante a súa intervención no Comité Provincial, afirmou que o socialismo “é máis necesario que nunca para garantir igualdade e servizos públicos fortes”.
Tomé subliñou que esta reunión pon fin ao ciclo congresual iniciado no 2024, un proceso que permitiu renovar órganos, consolidar equipos e incrementar o peso político da provincia nos órganos nacionais e federais do partido. “Remata un período longo e comeza un novo tempo político coa vista posta nas municipais do 2027”, expresou.
Neste novo escenario, reivindicou a necesidade de relanzar o proxecto socialista en toda a provincia mediante unha acción planificada e coordinada. Insistiu en que o partido debe traballar cunha mensaxe “única, sinxela, directa e reiterada”, apoiándose en estruturas orgánicas e institucionais que permitan fortalecer o traballo territorial.
O dirixente socialista definiu o proxecto do PSdeG como “feminista, medioambiental e galego”, orientado a mellorar os servizos públicos, defender a lingua e reclamar avances en infraestruturas viarias e ferroviarias, así como condicións de vida dignas en toda a provincia. “Uns servizos públicos fortes son a mellor garantía de igualdade. O contrario é a lei do máis forte, que converte dereitos en negocios duns poucos”, advertiu.
Tomé avanzou que o partido estará presente nos grandes debates que afectan á provincia e a Galicia: a defensa da sanidade e do ensino públicos, a loita contra a violencia machista, o rexeitamento ao canon de Sogama, a reivindicación dun financiamento autonómico para o SAF, a permanencia de Alcoa e a oposición ao que cualificou como “a gran mentira do PP con Altri”. Tamén reclamou unha RTVG “galega, pública e ao servizo da cidadanía, e non do Partido Popular”.
Durante o seu discurso, puxo en valor a forte implantación municipal do PSdeG en Lugo, lembrando que o partido goberna para a maioría da poboación, incluídas as principais vilas, a capital e a Deputación. Destacou o coñecemento acumulado polos cargos públicos e agrupacións tras meses de encontros e visitas ás comarcas. “As agrupacións son a columna vertebral do Partido Socialista”, afirmou, agradecendo tamén o traballo dos grupos que están na oposición.
De cara ás municipais de 2027, marcou un horizonte de “ambición e realismo”: aumentar a representación en todos os concellos, manter e reforzar as alcaldías actuais, recuperar aquelas perdidas “polas malas artes do PP” e sumar novos gobernos locais. Ademais, destacou a importancia de garantir a continuidade dun executivo progresista na Deputación: “Temos unha forza institucional preparada, entusiasta e uns militantes que son o motor deste proxecto”.
“Queda moito por facer e moito por conseguir. Imos traballar, imos ilusionar e imos seguir construíndo provincia”, concluíu.