José Tomé e Miguel Fernández reúnense para seguir fortalecendo a colaboración entre administracións
O presidente da Deputación de Lugo, José Tomé Roca, e o alcalde de Lugo, Miguel Fernández Méndez, mantiveron un encontro marcado pola lealdade institucional e a vontade de continuar fortalecendo a cooperación entre ambas administracións e no que abordaron proxectos estratéxicos comúns, destacando a importancia de seguir impulsando o desenvolvemento da cidade.
Tomé Roca destacou o liderado e a dedicación de Miguel Fernández ao servizo público, subliñando que a súa chegada á Alcaldía garante a continuidade dos proxectos transformadores iniciados por Lara Méndez e seguidos por Paula Alvarellos.
Entre as iniciativas prioritarias, resaltaron as obras do desdobramento da avenida Infanta Elena, que conta cunha inversión de 1,3 millóns de euros da Deputación. Anunciaron que nas próximas semanas comezará a fase final das obras, abranguendo desde a glorieta de Garaballa de Arriba ata a de Benigno Rivera. Segundo o mandatario provincial, esta intervención mellorará a seguridade e comodidade para os peóns, ademais de optimizar o transporte público e preparar a cidade para os retos futuros.
Compromiso coa mellora de infraestruturas
No encontro, ambos mandatarios repasaron os investimentos da Deputación en infraestruturas clave para a cidade. Ademais do proxecto de Infanta Elena, abordaron o Plan Deputación, cunha achega superior ao medio millón de euros, e a colaboración en eventos como o Caudal Fest e o Arde Lucus.
Desde a chegada de Tomé Roca á presidencia, a Deputación investiu case 3,7 millóns de euros na mellora das estradas provinciais en Lugo. Entre as actuacións destacadas, mencionouse a rehabilitación da LU-P-2901, que conecta Lugo con Palas de Rei, a reforma do cinto comarcal ao seu paso pola capital, e a mellora dos accesos a Santa Eulalia de Bóveda. Ademais, salientaron a renovación completa do firme na estrada do Río Rato, onde tamén se executou un carril bici e obras de humanización na contorna.
Un momento especial para o novo Alcalde
Tras a reunión, Miguel Fernández asinou no Libro de Ouro da Deputación, manifestando a súa emoción por este acto simbólico. O alcalde expresou o seu agradecemento e destacou a importancia da colaboración entre Concello e Deputación para consolidar o proceso de modernización da cidade. Segundo Fernández, esta cooperación permite mellorar a calidade de vida da cidadanía, impulsar o desenvolvemento económico e favorecer a fixación de poboación no territorio.
O encontro concluíu cunha reunión privada entre os dous mandatarios, reafirmando o compromiso de ambas administracións de seguir traballando conxuntamente para o progreso de Lugo.