Juan Baroja substituirá a José Luis Novo na Corporación de Rábade
A Corporación de Rábade celebrou hoxe un pleno de carácter ordinario no que, entre outros asuntos, se fixo efectiva a renuncia de José Luis Novo, quen será substituído no cargo por Juan Baroja na próxima sesión que se celebre.
A partir do seguinte pleno Juan Baroja, traballador de Correos agora xubilado, asumirá as áreas de Economía e Persoal no Goberno local, as mesmas que tiña designadas o seu antecesor.
A alcaldesa de Rábade, Reme González, tivo palabras de agradecemento para Novo, a quen lle augurou moitos éxitos no desempeño das súas novas obrigas na Comisión de Pequenos Concellos do PPdeG.
Pola súa banda, o concelleiro saínte, José Luis Novo, quixo darlles as grazas a todos os veciños e veciñas “polo comportamento e respecto que lle manifestaron” no seu período no Goberno local. Quixo tamén desculparse por se cometeu algún erro “co que os veciños puideran sentirse decepcionados ou ofendidos” asegurando que a súa intención foi sempre “a de servir coa maior honradez posible”.
Na súa despedida tamén quixo agradecerlle a alcaldesa a oportunidade que lle brindou engadindo que “sempre me terá a disposición para o que precise”.
Tamén mencionou aos funcionarios e persoal municipal e destacou a boa sintonía con todos eles.
Por último, desexoulle “toda a sorte do mundo” a Juan Baroja, que será o novo concelleiro, “unha persoa tremendamente capacitada”, concluíu.