La Spagna ofrecerá un concerto titulado Lamenti di donna no Círculo das Artes de Lugo
O próximo 20 de maio, ás 20:30 horas no Círculo das Artes, o 52º Festival de Música Cidade de Lugo acollerá un dos concertos máis emotivos da súa 52 edición.
O conxunto de música antiga La Spagna, baixo a dirección de Alejandro Marías, ofrecerá o programa titulado Lamenti di donna, no que a soprano Jiayu Jin interpretará pezas que exploran o sufrimento das mulleres na música e na poesía italiana do século XVII.
A través de obras de compositores como Claudio Monteverdi, Giacomo Carissimi, Barbara Strozzi ou Benedetto Castaldi, o recital afondará na expresión do lamento feminino, nun diálogo entre voz, lirone, clave, órgano, archilaúd, arpa doppia e viola da gamba, a cargo dun destacado elenco de músicos especializados na interpretación historicista.
Xunto a Jiayu Jin estarán Sabina Colonna Preti ao lirone, Jorge López-Escribano ao clave e órgano, Ramiro Morales ao archilaúd, Manuel Vilas á arpa doppia e o propio Alejandro Marías á viola da gamba, ademais da dirección musical.
Este concerto forma parte dun cartel no que tamén destaca a presenza do contratenor Carlos Mena, que presentará, xunto ao grupo Concerto 1700, un programa centrado na música sacra de Antonio Vivaldi.
A formación La Ritirata, pola súa banda, proporá unha viaxe polas danzas do comezo do barroco que animaban as cortes de España e Italia e o Reino de Nápoles, completando así unha programación que promete ser unha celebración da riqueza sonora e expresiva da música antiga.