Licitada a obra de construción do novo centro de saúde de Antas de Ulla
![antas de ulla concello](https://lugoxa.com/wp-content/uploads/2021/03/antas-de-ulla-concello.jpg)
Publicado no día de onte a licitación da redacción do proxecto básico e de execución, así como a dirección da obra de construción do novo centro de saúde de Antas de Ulla, por un importe total de 51.500 euros.
As empresas interesadas teñen ata o 14 de xuño para presentar ofertas e a que resulte adxudicataria disporá dun mes para redactar o proxecto básico e dous meses para finalizar o documento de execución.
Séguese avanzando así nos trámites encamiñados á construción da infraestrutura sanitaria, despois de que se aprobase o pasado 18 de marzo a aceptación da parcela cedida polo Concello para executar un edificio de 850 metros cadrados que case triplicará en superficie ao actual, de 317.
Segundo o plan funcional aprobado, a empresa adxudicataria deberá deseñar un centro que contará con consultas máis espazosas e cunha sala polivalente que agora non existe. O novo ambulatorio disporá de dúas consultas de medicina, dúas de enfermería, unha polivalente, unha de toma de mostras e unha sala de xuntas.