Lugo abre o prazo para as axudas na compra de libros de texto
Lugo abre o prazo para as axudas para a compra de libros de texto e material escolar para familias con baixos recursos. "Seguimos a traballar na mellora dos tempos deste trámite, que este ano contamos con ter rematado de cara ao inicio do curso escolar", declarou Maite Ferreiro, que engadiu "desde a concellería de Educación esforzámonos en facilitar ás familias, no menor prazo de tempo posíbel, esta axuda que serve para garantir o acceso ao material a moitas nenas e nenos".
A concellería de Educación avanza no procedemento que permite ás familias con baixos recursos optar a un dos 400 cheques de 100 euros, ata completar un total de 40.000 euros dedicados a esta liña de axudas. O criterio único para a concesión da axuda é a renda per cápita anual da unidade familiar quedando este ano establecido o tope no 85 % do IPREM. En total, a concellería de Educación atendeu a 723 solicitudes para estas axudas.
As bases publicáronse no BOP, o que abre o prazo de presentación de solicitudes ao longo dos próximos 15 días, a través do rexistro presencial ou telemático. "Simplificamos o máximo posible o procedemento para garantir que as axudas se poidan entregar no menor tempo posible", afirmou a concelleira.