Lugo acolle mañá un reto de maxia extrema
Mañá chega a Lugo o espectáculo de maxia extrema Centímetros cúbicos que protagoniza Víctor Cerro enmarcado dentro do O Festival Mundial do Ilusionismo Galicia Ilusiona. O espectáculo é gratuíto e terá lugar na rúa da Raíña a partir das 20.30 horas.
Víctor Cerro está considerado un dos mellores escapistas do mundo e ten un récord mundial en maxia extrema. Neste reto, deberá evitar ser arrastrado por un vehículo de gran cilindrada; estará presentado polo xornalista deportivo Terio Carrea.
Outro dos pratos fortes do festival será a gran gala máxica internacional, que se celebrará o 3 de setembro no auditorio Gustavo Freire. Sete dos mellores magos e magas do panorama internacional traerán a Lugo actuacións de maxia de preto, escapismo, maxia de gran formato, telequinese, mentalismo, poesía máxica ou ilusionismo infantil. A gran gala máxica será o único espectáculo deste festival para o que se precise entrada.
Ademais de na cidade de Lugo, durante os meses de agosto e setembro o festival desenvolve a súa programación nos concellos de Burela, Chantada, Cervo, Castro de Rei, Foz, Cospeito, Guitiriz, Friol, Monforte de Lemos, Sober, Outeiro de Rei, Monterroso, Ribadeo, Sarria, Vilalba e Viveiro.
