Lugo acolle o foro internacional Corredor Galicia-Asia para fortalecer os vínculos comerciais con Asia
Lugo acolle o Foro Executivo Corredor Galicia & Asia 2025, un encontro que sitúa á cidade como epicentro do diálogo económico e académico entre Galicia e o continente asiático.
A iniciativa, que se celebra no Campus Terra da Universidade de Santiago de Compostela, reúne a empresarios, investigadores e representantes institucionais de sectores como a saúde, a alimentación, a innovación e o envellecemento, co obxectivo de tecer lazos de cooperación e abrir novas oportunidades comerciais e de investimento.
Na xornada previa ao foro, o presidente da Deputación de Lugo, José Tomé Roca, recibiu no Pazo de San Marcos á delegación asiática acompañada por representantes da Confederación de Empresarios de Lugo (CEL), da Cámara de Comercio e de Prorural Galicia. Entre os asistentes atopábanse figuras destacadas como o presidente da Asociación promotora do foro Asia-China para a Cooperación e o Desenvolvemento Internacional (AACCDI), Juan Fang, o profesor e investigador da Universidade de Jinan, Yan Qunchao, e o director financeiro da Asociación de Institucións Médicas Avanzadas do Xapón, Kudo Tokuro.
Durante a recepción, Tomé destacou que o foro “consolida a Lugo como un punto de encontro internacional para o intercambio empresarial e académico” e subliñou a importancia de fortalecer as relacións con Asia. O mandatario provincial insistiu en que a Deputación traballa en estreita colaboración con entidades locais para impulsar a internacionalización das empresas lucenses, apoiando a exportación de produtos e servizos e fomentando a chegada de investimento estranxeiro.
O presidente tamén compartiu cos visitantes proxectos vinculados ao sector primario, como as iniciativas desenvolvidas na Granxa Gayoso Castro e na Granxa Experimental de Leite en colaboración coa USC, ademais de poñer en valor as políticas sociais da institución provincial.
Pola súa banda, o delegado territorial da Xunta en Lugo, Javier Arias, mantivo tamén un encontro cos organizadores e participantes do foro, no que salientou “a oportunidade que supón esta cita para aproveitar sinerxías e reforzar lazos comerciais entre Galicia e Asia”. Arias lembrou que países como Xapón se consolidan como destinos estables para as exportacións galegas e asegurou que a Xunta ofrece “unha Administración próxima, áxil e con garantías para os proxectos internacionais que desexen implantarse na comunidade”.
O foro, promovido pola Asociación Asia-China para a Cooperación e o Desenvolvemento Internacional e organizado por Prorural Galicia, conta coa colaboración da CEL, do Campus Terra da USC e co apoio institucional da Deputación de Lugo, do Concello e da Xunta de Galicia, consolidándose como unha ponte estratéxica para o desenvolvemento económico e científico entre Galicia e Asia.