Lugo acolle por primera vez un curso de verán sobre nutrición no deporte
![DEPUTACION CURSO VERAN NUTRICION DEPORTE ALTO RENDEMENTO](https://lugoxa.com/wp-content/uploads/2023/07/DEPUTACION-CURSO-VERAN-NUTRICION-DEPORTE-ALTO-RENDEMENTO.jpg)
O deputado provincial Miguel Fernández inaugurou este martes xunto á decana da Facultade de Ciencias, Asteria Luzardo, o curso de verán da USC Valoración nutricional e abordaxe personalizado do deportista de alto rendemento que se desenvolve por primeira vez no Campus Terra coa colaboración da Deputación de Lugo. O acto de apertura tivo lugar no salón de actos da facultade, que desde hoxe e ata o venres, acolle esta acción formativa na que estudantes, técnicos e expertos na rama da dietética afondarán sobre aspectos fundamentais para unha adecuada alimentación na práctica deportiva.
Miguel Fernández destacou o intenso compromiso da Deputación coa universidade pública, “renovando ano tras ano o noso apoio ás iniciativas do Campus, tanto nos cursos de verán, coma na mellora de infraestruturas ou no desenvolvemento de iniciativas conxuntas, como é o caso da Granxa Experimental de Leite Gayoso Castro”. O deputado felicitou á Universidade de Santiago de Compostela “por apostar pola educación continua con accións formativas coma esta, que xa forman parte dunha longa tradición, e que completan e dan un valor diferenciado á oferta do Campus lucense”.
As xornadas, que combinarán un formato de aprendizaxe de clases expositivas e interactivas, arrancaron na mañá deste martes coa intervención da traumatóloga especialista en medina deportiva e membro do equipo médico de Leite Río Breogán Luisa Ignacia Ibáñez, quen imparte o relatorio Fisioterapia e nutrición deportiva, parella de ases en recuperación de lesións? Xunto a Ibáñez, reputados expertos e investigadores do mundo deportivo de todo o país aportarán aos estudantes as estratexias nutricionais e consellos personalizados para mellorar o rendemento físico deportivo.
Deste xeito, estas primeiras xornadas contarán, entre outros, con Javier Amezaga Mariezcurrena, investigador doctor en Nutrigenómica e Nutrición persoalizada, AZTI (Bizkaia), Sergio Brisa e Emanuela Gornati, do CEO e chef deportiva de MIOBIO (Valencia), ou Francisco Miguel Tobal, médico especialista en Medicina da Educación Física e o Deporte, director da Escola de Medicina do Deporte de Madrid na Universidade Complutense (Madrid).