Lugo acollerá a 1ª Feira do Emprendemento Infantil o vindeiro 24 de maio
O venres 24 de maio, de 16:30 a 20:30 horas, Lugo converterase no escenario da 1ª Feira do Empredemento Infantil, unha iniciativa pioneira que busca fomentar o espírito emprendedor entre os máis pequenos da cidade.
A actividade, de carácter lúdico, festivo e educativo, terá lugar na Praza Maior, diante do CPR Franciscanos, se o tempo o permite; en caso contrario, celebrarase nas instalacións do propio centro educativo.
A feira reunirá a 32 nenos e nenas de entre 8 e 12 anos que, repartidos en 17 Micro-Empresas, presentarán os produtos que levan días preparando con ilusión e esforzo.
Durante a xornada, cada equipo, coa axuda dun adulto, explicará aos visitantes o seu proxecto no marco dun mercadillo infantil, co obxectivo de coñecer ao final da feira se a súa empresa "funcionou" ou non.
Esta actividade pretende achegar ao alumnado conceptos clave do mundo empresarial de forma divertida e práctica, facendo especial fincapé na creatividade, o traballo en equipo, a responsabilidade e a iniciativa persoal.
A 1ª Feira do Empredemento Infantil nace con vontade de continuidade e con clara vocación de potenciar o talento e a capacidade emprendedora da infancia lucense, ao tempo que promove valores como a cooperación e a autoestima.