Lugo acollerá as primeiras xornadas pedagóxicas de arqueoloxía lucense
A Consellería de Cultura, Lingua e Xuventude organiza en Lugo as I Xornadas pedagóxicas de arqueoloxía lucense, que se celebrarán o sábado 4 de outubro no salón de actos da Delegación Territorial. A iniciativa busca achegar á cidadanía os resultados das intervencións arqueolóxicas máis recentes en diferentes xacementos da provincia, da man dos especialistas que as dirixiron.
A programación comezará ás 9:30 horas cun bloque dedicado ao patrimonio datado entre o Paleolítico e a Idade do Ferro. O catedrático de Prehistoria Ramón Fábregas e a profesora de Arqueoloxía María Pilar Prieto, da Universidade de Santiago de Compostela, abrirán as sesións falando das primeiras pegadas humanas en Lugo e do Corro dos Mouros de Adai. Seguiranlles Benito Vilas e o xestor cultural Xosé Gago, que presentarán os avances das últimas campañas no xacemento de Penas do Castelo, en A Pobra do Brollón, e Emilio Ramil, quen abordará as intervencións no castro de Saa, en A Pastoriza.
Xa pola tarde, ás 16:00 horas, Yolanda Álvarez e Luis F. López centrarán a súa exposición no castro do Teso da Ermida, en Navia de Suarna. López intervirá tamén xunto a Brais Currás, científico do CSIC, nunha conferencia sobre o Monte Cido e o poboamento dos montes do Courel en época romana. O programa pecharase coas intervencións de Francisco Alonso sobre o xacemento romano de Proendos, en Sober, e de Xurxo Ayán (Universidade Nova de Lisboa) e Sonia García (CSIC), que se centrarán no sitio medieval do Preguntoiro, en Pantón.
O delegado territorial da Xunta en Lugo, Javier Arias, destacou que as xornadas, abertas ao público sen inscrición previa, son unha oportunidade para coñecer mellor o pasado da provincia, valorar o patrimonio arqueolóxico e comprender a identidade colectiva a través dos vestixios históricos que conserva o territorio.